Meld deg på

Neste prøve du kan melde deg opp til, er prøven som er i mars 2025.

Påmeldinga opnar måndag 27. januar 2025 kl. 09:00 og stenger fredag 31. januar 2025 kl. 23:59.

Du vel sjølv kor mange delprøver du vil melde deg opp til (det er fire delprøver i norskprøven). Du kan ikkje melde deg opp til den same delprøven fleire gonger i den same perioden.

På to av delprøvene må du velje kva nivå du vil ta prøven på.

Fullfør heile påmeldinga

Det er viktig at du fullfører heile påmeldinga. Du må velje korleis du skal betale for Prøven. Du er påmeldt når du har fått ein stadfesting på SMS og e-post.

Du må oppgi riktig adresse når du melder deg på prøven. Har du flytta og fått ny adresse, må du gi beskjed til prøvestaden.

Kven kan ta prøven?

Målgruppa for norskprøvene er personar mellom 18 og 67 år. Prøvene inneheld oppgåver som er retta mot vaksne og kan vere utfordrande for kandidatar under 18 år å svare på.

Fleire prøvestader arrangerer prøven berre for dei som høyrer til kommunen.

Bur du i utlandet?

Høyrer du ikkje til ein kommune eller bur du i utlandet?

Desse stadene kan du ta prøven:

• Trondheim Vaksenopplæring (Trøndelag fylke)
• Vaksenopplæringa i Øvre Eiker (Buskerud fylke)
• Lørenskog voksenopplæring (Akershus fylke)
• Larvik læringssenter (Vestfold fylke)

Dersom du ønskjer å ta prøven i ein annan kommune, må du kontakte kommunen og spørje om du kan ta prøven der. Dette må du gjere før du melder deg på prøven, for å vere sikker på at du får ta ho på prøvestaden.

Norskprøven kan ikkje takast i utlandet.

Kva kostar det å ta prøven?

Din kommune bestemmer kva prøven skal koste. Prisen kan variere mellom 400 kroner (eller meir) for ei delprøve og 2 200 kroner (eller mindre) for heile norskprøven.

Du finn dei riktige prisane i påmeldingsportalen. Du kan også kontakte prøvestaden for å få vite kva prøvene kostar hos dei.

Det er prøvestadane som har ansvar for betalinga. Vanlege måtar å betale på er bankkort (når du fyller ut skjemaet i påmeldingsportalen), i nettbank, få faktura eller etter avtale med prøvestaden. Påmeldinga er ikkje gyldig før du har valt korleis du skal betale for Prøven og registrert påmelding.

Rett og plikt til prøven

Har du rett og plikt til å delta i opplæring i norsk, kan du ta alle delprøvene gratis éin gong. Det er prøvestaden som melder deg opp til gratis prøve.

Dersom du ikkje har rett og plikt til opplæring i norsk, eller skal ta prøven på nytt, må du melde deg på prøven sjølv. Når du melder deg på sjølv, må du også betale for prøven.

Du kan lese meir om varigheit og omfang av opplæring i norsk og samfunnskunnskap for personar med rett og plikt til gratis opplæring på nettsidene til Integrerings- og mangfoldsdirektoratet (IMDi).

Kva nivå skal eg velje?

Norskprøven A1–B2 har fire delprøver:

• Leseprøve
• Lytteprøve
• Skriveprøve
• Munnleg prøve

Når du melder deg på skriveprøven eller den munnlege prøven, må du velje kva nivå du skal ta delprøvene i. For kvar av desse to delprøvene vel du om du vil ta prøven på nivå:

• A1–A2
• A2–B1
• B1–B2

På den munnlege prøven kan du få eit betre resultat enn det nivået du har meldt deg opp til, men det kan du ikkje på delprøven i skriftleg framstilling. Det er derfor viktig at du melder deg på riktig nivå.

Lese- og lytteprøven blir ofte tatt saman med skriveprøven. Dersom du melder deg på desse tre delprøvene samtidig, vel du nivå berre for skriveprøven. Lese- og lytteprøvene tilpassar seg nivået ditt automatisk under prøven.

Hjelp til å velje nivå

Dersom du går på eit norskkurs, kan du spørje læraren din om hjelp til å velje riktig nivå.

Du kan også bruke vår nivåveljar som hjelp til å velje riktig nivå på prøvene.

I tillegg finst det skjema for eigenvurdering som også kan vere til hjelp:

• Last ned Eigenvurdering av munnlege språkferdigheiter (Word)
• Last ned Eigenvurdering av skriftlege språkferdigheiter (Word)

Når kjem innkallinga?

Du vil få innkallingsbrev/-e-post frå prøvestaden to veker før du skal ta prøven. Du kan også få brevet tidlegare enn dette.

I brevet får du vite dato, klokkeslett og stad for prøven. Det er vanleg at skriftleg prøve og munnleg prøve er på to forskjellige datoar.

Har du spørsmål om dato for prøven di, må du kontakte prøvestaden din.

Vil du melde deg av prøven?

Påmeldinga til prøvene er bindande. Det betyr at når du melder deg på prøven, må du betale for ho sjølv om du ikkje kan ta ho. Har du sjukemelding, kan du ta prøven seinare utan å betale igjen.

Du må kontakte prøvestaden din for å melde deg av.

Tilrettelegging

Prøven kan tilpassast eller tilretteleggjast på ulike måtar. Tilrettelegging kan til dømes vere ekstra tid, eller at du får sitje på eit eige rom når du skal ta prøven.

Du må kontakte prøvestaden din raskast mogleg, men seinast tre dagar etter at du meldte deg opp til prøven.

Les meir om tilrettelegging av prøven.